القلب
أفكار مساعدة في الإحياء العاشورائي
تفتح الستار ..أضواء خافتة ..موسيقى خافتة ...تظهر شخصية " القلب" مرتدياً لباس القلب بلون أسود ...
القلب : السلام عليكم يا أحباب الحسين "ع" ...عظم الله أجورنا وأجوركم بمصاب أبي عبد الله الحسين ""ع" ....قد تسألون ليش لابس أسود وأنا القلب عطول لوني أحمر ..مش هيك؟
يمشي ببطء على المسرح مع موسيقى حزينة ..أنا كتير حزنان وزعلان ..هيدي الأيام اللي نخنا فيها هي أيام حزينة لأنها أيام حزن الرسول "ص" وحزن علي "ع" والزهراء "ع" على مصيبة كربلاء ..
أنا القلب الحزين ولابس لون الأحزان ...متل ما السماء حزينة والشمس حزينة والأيام حزينة ......(موسيقى) .
وإنتوا يا أعزاء الحسين "ع" ليش لابسين أسود ؟؟ليش جايين لهون؟؟طلعتوا بقلوبكم إذا حزينة ولابسة أسود ؟؟؟ ( أجوبة من العناصر ) .
طيب يا أحباب الحسين "ع" ...بدي أحكيكن كم آداب أنا بتبعها بهالأيام وكل الأيام وخاصة لما بحضر مجلس عزاء حسيني ..بدكن تعرفوها؟وتطبقوها ؟؟
طيب قبل البدء بدي اسمع منكم ومن قلوبكم ( لبيك يا حسين ) ( فداك يا حسين ) .
بدي قلن يا أنصار الحسين "ع" عن حالتي أنا القلب عنصر أساسي في ضبط النفس وانفعالها .أنا حجمي كتير صغير عندي موجودة المحبة والشوق والتأثر والغضب وعندي العشق لأهل البيت وعندي الطمأنينة والأمان ...
بس إجي على المجلس العزاء بترك كل همومي ومشاكلي في الخارج ..وما بعود فكر بشي إلا أني قاعد بمجلس أبي عبد الله الحسين "ع" بصير فكر فيه وبأصحابه وبأخته السيدة زينب "ع" وأخيه أبي الفضل "ع" (موسيقى ) .....وما بقدر إلا أتخيل يلي صار فيهم وأرجف وأرتعش مثل ما الناس بترجف من البرد ...
إذا بدكن قلوبكن تكون مثلي ..كلنا خلينا نحط أيدينا على قلوبنا ونسمع دقات قلوبنا شو عم تحكي ....
بدكن ساعدكن سمعوا منيح ..بس نفوت عالمجلس وحتى خلال المجلس منحاول نحضّر قلبنا الصغير وما نفكر بشي إلا بالمصيبة اللي عن نسمعها ونحاول نتخيل اللي صار ..ونشوفوا متل فيلم إدام عيونا وتكون الدمعة اللي عم تنزل كلا قربة لله تعالى...
وساعتها أكيد رح ترجف الإيد ودمعة العين بداخل كل انسان عاشق ومشتاق لأهل البيت"ع".
وبدي ياكن تحفظوا معي هالحديث :
(عن الرسول "ص" ( إن الله تبارك وتعالى لا ينظر إلى صوركم ولا إلى أموالكم ولكن ينظر إلى قلوبكم وأعمالكم )
(وعن الإمام علي "ع" إن هذه القلوب أوعية فخيرها أوعاها )
المخيّم الكشفي